Sa edad na beinte-kuwatro ay patuloy na naghihintay ng pagkakataon si Dana Salazar upang maabot ang matagal ng pangarap—maging isang professional ballroom dancer.

Biniyayaan siya ng kapalaran noong inilunsad ang Let’s Dance Philippines, isang malakihang national competition kung saan isang kategorya ay pair ballroom.

Mas malaking biyaya ang kapares niyang si Ra Carantes na kapareho rin niya ng pangarap sa buhay. Maliban sa angkin nitong kakisigan na hindi niya pinagsasawaang pagmasdan, ito rin ang eksaktong imahe ng matagal na niyang dream guy—guwapo at ubod ng galing sumayaw. Mabilis siyang nabighani ni Ra sa gabi-gabi nilang pagsasanay. Naging malapit sila sa isa’t-isa,  ngunit nananatili siyang nagtataka kung ano ang halaga niya rito.

Siya ba ay kapares lang upang manalo sa paligsahan at matamo nito ang pangarap?